Ինչպես և սպասվում էր, հանդիպումը անցավ լարված մթնոլորտում: Առաջին իսկ րոպեներից երկու թմերն էլ վտանգավոր գրոհներ էին կազմակերպում միմյանց դարպասների մոտ:
Սակայն առավել վտանգավոր և ագրեսիվ խաղ էր ցուցադրում Միլանը, և հերթական գրոհներից հետո` խաղի 15-րդ րոպեին, Միլանի կիսապաշտպան Անտոնիո Նոչերինոյի շեշտակի հարվածից հետո գնդակը դիպավ Յուվենթուսի պաշտպան Բոնուչչիի գլխին և շեղելով ուղությունը` հայտնվեց Ջիջջի Բուֆոնի պաշտպանած դարպասում: Միլանը շարունակում էր գրոհել և շատ չանցած, Մունտարիի գլխի հարվածից հետո գնդակը հատեց դարպասի եզրագիծը, սակայն մրցավարները չնկատեցին այդ պահը և գոլի գրանցում չարձանագրեցին: Առաջին խաղակեսն ավարտվեց տան տերերի հաղթանակով` 1-0:
Երկրորդ խաղակեսը նույնպես սկսվեց անզիջում պայքարով: Յուվենթուսը արդեն ավելի շատ էր գրոհում` փորձելով փրկել խաղը: Եվ արդեն հանդիպման վերջնամասում` 83-րդ րոպեին, փոխարինման դուրս եկած Ալեսանդրո Մատրին գրավեց Աբիատիի պաշտպանած դարպասը: Հանդիպումն ավարտվեց մարտական ոչ-ոքի` 1-1:
Հիշեցնենք, որ Միլանը շարունակում է 51 միավորով գլխավորել մրցաշարային աղյուսակը, սակայն նրանից մեկ միավորով հետ է մնում Յուվենթուսը, ընդ որում` առջևում ունենալով Պարմայի դեմ հետաձգված հանդիպումը:
.png "/ English"){kind=small}
